تفسیر احسن البیان (تفسیر مکی)

[محمد نعیم یونس]

لَا تُحَرِّ‌كْ بِهِ لِسَانَكَ لِتَعْجَلَ بِهِ ﴿١٦﴾
(اے نبی) آپ قرآن کو جلدی (یاد کرنے) کے لیے اپنی زبان کو حرکت (١) نہ دیں۔
١٦۔١ حضرت جبرائیل عليہ السلام جب وحی لے کر آتے نبی ﷺ بھی ان کے ساتھ عجلت سے پڑھتے جاتے کہ کہیں کوئی لفظ بھول نہ جائے۔ اللہ نے آپ کو فرشتے کے ساتھ ساتھ اس طرح پڑھنے سے منع فرمایا۔ (صحیح بخاری، تفسیر سورۃ القیامہ) یہ مضمون پہلے بھی گزر چکا ہے ﴿وَلَا تَعْجَلْ بِالْقُرْآنِ مِنْ قَبْلِ أَنْ يُقْضَى إِلَيْكَ وَحْيُهُ﴾ (سورۃ طٰہٰ: ۱۱۴) چنانچہ اس حکم کے بعد آپ خاموشی سے سنتے۔

 

[محمد نعیم یونس]

إِنَّ عَلَيْنَا جَمْعَهُ وَقُرْ‌آنَهُ ﴿١٧﴾
اسکا جمع کرنا اور (آپ کی زبان سے) پڑھنا ہمارے ذمہ ہے۔ (١)
١٧۔١ یعنی آپ کے سینے میں اس کا جمع کر دینا اور آپ کی زبان پر اس کی قرأت کو جاری کر دینا ہماری ذمہ داری ہے۔ تاکہ اس کا کوئی حصہ آپ کی یاد داشت سے نہ نکلے اور آپ کے ذہن سے محو نہ ہو۔

 

[محمد نعیم یونس]

فَإِذَا قَرَ‌أْنَاهُ فَاتَّبِعْ قُرْ‌آنَهُ ﴿١٨﴾
ہم جب اسے پڑھ (١) لیں تو آپ اس کے پڑھنے کی پیروی کریں۔ (٢)
١٨۔١ یعنی فرشتے (جبرائیل علیہ السلام) کے ذریعے سے جب ہم اس کی قرأت آپ پر پوری کر لیں۔
١٨۔٢ یعنی اس کے شرائع و احکام لوگوں کو پڑھ کر سنائیں اور ان کی اتباع بھی کریں۔

 

[محمد نعیم یونس]

ثُمَّ إِنَّ عَلَيْنَا بَيَانَهُ ﴿١٩﴾
پھر اس کا واضح کر دینا ہمارے ذمہ ہے۔
۱۹۔۱ یعنی اس کے مشکل مقامات کی تشریح اور حلال و حرام کی توضیح، یہ بھی ہمارے ذمے ہے۔ اس کا صاف مطلب ہے کہ نبی صلی اللہ علیہ وسلم نے قرآن کے مجملات کی جو تفصیل، مبہمات کی توضیح اور اس کے عمومات کی جو تخصیص بیان فرمائی ہے، جسے حدیث کہا جاتا ہے، یہ بھی اللہ کی طرف سے ہی الہام اور سمجھائی ہوئی باتیں ہیں۔ اس لیے انہیں بھی قرآن کی طرح ماننا ضروری ہے۔

 

[محمد نعیم یونس]

كَلَّا بَلْ تُحِبُّونَ الْعَاجِلَةَ ﴿٢٠﴾
نہیں نہیں تم جلدی ملنے والی (دنیا) کی محبت رکھتے ہو۔

وَتَذَرُ‌ونَ الْآخِرَ‌ةَ ﴿٢١﴾
اور آخرت کو چھوڑ بیٹھے ہو۔ (١)
٢١۔١ یعنی یوم قیامت کی تکذیب، ما انزل اللہ کی مخالفت اور حق سے اعراض، اس لیے ہے کہ تم نے دنیا کی زندگی کو ہی سب کچھ سمجھ رکھا ہے اور آخرت تمہیں بالکل فراموش ہے۔

 

[محمد نعیم یونس]

وُجُوهٌ يَوْمَئِذٍ نَّاضِرَةٌ ﴿٢٢﴾
اس روز بہت سے چہرے تر و تازہ اور بارونق ہوں گے۔

إِلَىٰ رَ‌بِّهَا نَاظِرَ‌ةٌ ﴿٢٣﴾
اپنے رب کی طرف دیکھتے ہوں گے۔ (١)
٢٣۔١ یہ اہل ایمان کے چہرے ہوں گے جو اپنے حسن انجام کی وجہ سے مطمئن، مسرور اور منور ہوں گے۔ مزید دیدار الٰہی سے بھی حظ اندوز ہوں گے۔ جیسا کہ صحیح احادیث سے ثابت ہے اور اہل سنت کا متفقہ عقیدہ ہے۔

 

[محمد نعیم یونس]

وَوُجُوهٌ يَوْمَئِذٍ بَاسِرَةٌ ﴿٢٢﴾
اور کتنے چہرے اس دن (بد رونق اور) اداس ہوں گے۔ (١)
٢٤۔١ یہ کافروں کے چہرے ہوں گے۔ بَاسِرَةٌ متغیر، زرد، غم و حزن سے سیاہ اور بے رونق۔

 

[محمد نعیم یونس]

تَظُنُّ أَن يُفْعَلَ بِهَا فَاقِرَ‌ةٌ ﴿٢٥﴾
سمجھتے ہوں گے کہ ان کے ساتھ کمر توڑ دینے والا معاملہ کیا جائے گا۔ (۱)
۲۵۔۱ اور وہ یہی کہ جہنم میں ان کو پھینک دیا جائے گا۔

 

[محمد نعیم یونس]

كَلَّا إِذَا بَلَغَتِ التَّرَ‌اقِيَ ﴿٢٦﴾
نہیں نہیں (١) جب روح ہنسلی تک (٢) پہنچے گی۔
٢٦۔١ یعنی یہ ممکن نہیں کہ کافر قیامت پر ایمان لے آئیں۔
٢٦۔٢ تراقی، ترقوہ کی جمع ہے۔ یہ گردن کے قریب، سینے اور کندھے کے درمیان ایک ہڈی ہے۔ یعنی جب موت کا آہنی پنجہ تمہیں اپنی گرفت میں لے لے گا۔

 

[محمد نعیم یونس]

وَقِيلَ مَنْ ۜ رَ‌اقٍ ﴿٢٧﴾
اور کہا جائے گا کہ کوئی جھاڑ پھونک (١) کرنے والا ہے؟
٢٧۔١ یعنی حاضرین میں سے کوئی ہے جو جھاڑ پھونک کے ذریعہ سے تمہیں موت کے پنجے سے چھڑا لے۔ بعض نے اس کا ترجمہ یہ بھی کیا ہے کہ اس کی روح کون لے کر چڑھے؟ ملائکہ رحمت یا ملائکہ عذاب؟ اس صورت میں یہ قول فرشتوں کا ہے۔