تعلیم و تربیت
عرب میں خود مردوں میں لکھنے پڑھنے کا رواج نہ تھا تو عورتوں میں کیا ہوتا ۔جب اسلام آیا تو قریش کے سارے قبیلہ میں صرف 17 آدمی لکھ پڑھ سکتے تھے۔ ان میں شفاء بنت عبد اللہ عدویہ صرف ایک عورت تھیں ۔ اسلام کی دنیوی برکتوں میں یہ واقعہ بھی کچھ کم اہم نہیں ہے کہ اسلام کی اشاعت کے ساتھ ساتھ لکھنے پڑھنے کا فن بھی ترقی کرتا جاتا تھا۔
آنحضرت (صلی اللہ علیہ وسلم) کی حضرت عائشہؓ سے اس کم سنی کی شادی میں بڑی مصلحت یہ تھی کہ لڑکپن سے ہی جو عین تعلیم و تربیت کا زمانہ ہے۔ آپؐ کی صحبت کا بھر پور فائدہ اٹھا کر وہ سارے جہاں کی عورتوں کے لئے نمونہ اور چراغِ راہ بنیں ۔اس لئے حضرت عائشہؓ کی تعلیم و تربیت کا اصلی زمانہ رخصتی کے بعد سے شروع ہوتا ہے۔ انہوں نے اسی زمانہ میں پڑھنا سیکھا۔ قرآن دیکھ کر پڑھتی تھیں ۔بہر حال پڑھنا لکھنا تو انسان کی ظاہری تعلیم ہے، حقیقی تعلیم و تربیت کا معیار اس سے بہت بلند ہے۔انسان کی تکمیل ، اخلاق کی پاکیزگی ، ضروریاتِ دین سے واقفیت ، شریعت سے آگہی ، کلامِ الٰہی کی سمجھ ، احکامِ نبوی کا علم بھی اعلیٰ تعلیم ہے۔ حضرت عائشہؓ اس تعلیم سے اچھی طرح واقف تھیں ۔ علوم دینیہ کے علاوہ تاریخ، ادب اور طب کا بھی بہت اچھا علم رکھتی تھیں ۔
علومِ دینیہ کی تعلیم کا کوئی وقت مخصوص نہ تھا۔ معلّمِ شریعتؐ خود گھر میں تھا اور ہر وقت اس کی صحبت میسر تھی۔ آنحضرت(صلی اللہ علیہ وسلم) کی تعلیم و ارشاد کی مجلسیں روزانہ مسجدِ نبویؐ میں ہوتی تھیں جو حجرۂ عائشہؓ سے بالکل لگی تھی، اس بناء پر آپؐ گھر سے باہر بھی لوگوں کو جو درس دیتے تھے وہ اس میں شریک رہتی تھیں ۔ اگر کبھی دوری کی وجہ سے کوئی بات سمجھ میں نہ آتی تو آنحضرت (صلی اللہ علیہ وسلم) جب زنانخا نہ میں تشریف لاتے دوبارہ پوچھ کر تشفّی کر لیتیں ۔کبھی اٹھ کر مسجد کے قریب چلی جاتیں ۔اس کے علاوہ آپ نے عورتوں کی درخواست پر ہفتہ میں ایک خاص دن انکی تعلیم و تلقین کے لئے متعیّن فرما دیا تھا۔
دن و رات اسلام کے بیسیوں مسئلے ان کے کان میں پڑتے تھے۔ ان کے علاوہ خود حضرت عائشہؓ کی عادت یہ تھی کہ ہر مسئلہ کو بے جھجھک آنحضرت (صلی اللہ علیہ وسلم) کے سامنے پیش کر دیتی تھیں اور جب تک تسلّی نہ ہو لیتی صبر نہ کر تیں ۔ ایک دفعہ آپؐ نے بیان فرمایا ’’ مَنْ حُوسِبَ عُذِّبَ ‘‘ یعنی قیامت میں جس کا حساب ہوا اس پر عذاب ہو گیا، عرض کیا یا رسول اللہ ! خدا تو فرماتا ہے: فَسَوفَ یُحَاسَبُ حِسابًا یَّسِیراً (انشقاق) یعنی اس سے آسان حساب لیا جائیگا، آپ نے فرمایا یہ ’’اعمال کی پیشی ہے، لیکن جس کے اعمال میں پوچھ تاچھ شروع ہوئی وہ تو برباد ہی ہوا‘‘۔
دوران وعظ ایک دفعہ آپؐ نے فرمایا کہ ’’ قیامت میں لوگ ننگے اٹھیں گے‘‘ عرض کی یا رسول اللہ ! عورت و مرد ایک ساتھ ہو نگے تو کیا ایک دوسرے کی طرف نظریں نہ اٹھ جائیں گی‘‘ ارشاد ہوا کہ ’’ عائشہؓ ! وقت عجب نازک ہو گا ‘‘ یعنی کسی کو کسی کی خبر نہ ہو گی۔ ایک بار دریافت کیا کہ’’ یا رسو ل اللہ قیامت میں ایک دوسرے کو کوئی یا د بھی کرے گا ؟‘‘ آپ نے فرمایا ’’ تین موقعوں پر کوئی کسی کو یاد نہ کریگا۔ایک تو جب اعمال تو لے جا رہے ہو نگے اور دوسرے جب اعمال نامے بٹ رہے ہونگے ، تیسرے جب جہنم گرج گرج کرکہہ رہی ہو گی کہ میں تین قسم کے آدمیوں کے لئے مقرر ہوئی ہوں ‘‘۔
عبد اللہ بن جدعان مکہ کا ایک نیک مزاج اور رحم دل مشرک تھا۔ اسلام سے پہلے قریش کی باہمی خونریزی کو روکنے کے لئے اس نے تمام سردارِ قریش کو جمع کر کے ایک صلح کی مجلس قائم کی تھی جس میں خود آنحضرت (صلی اللہ علیہ وسلم) بھی شریک تھے۔ حضرت عائشہؓ نے سوال کیا ’’ یا رسول اللہ ! عبد اللہ بن جدعان جاہلیت میں لوگوں سے مہربانی کے ساتھ پیش آتا تھا غریبوں کو کھانا کھلاتا تھا، کیا یہ عمل اس کو کچھ فائدہ دیگا‘‘؟ آپؐ نے جواب دیا ’’ نہیں عائشہؓ ! اس نے کسی دن یہ نہیں کہا کہ اللہ قیامت میں میری خطا معاف کرنا‘‘۔
نکاح میں رضامندی شرط ہے لیکن کنواری لڑکیاں اپنے منھ سے آپ تو رضا مندی نہیں ظاہر کر سکتیں ۔ اس لئے دریافت کیا کہ ’’ یا رسول اللہ ! نکاح میں عورت سے اجازت لے لینا چاہیئے ‘‘ فرمایا، ’’ ہاں ‘‘ عرض کی کہ ’’ وہ شرم سے چپ رہتی ہے ‘‘ارشاد ہوا کہ’’ اس کی خاموشی ہی اس کی اجازت ہے‘‘۔
اسلام میں پڑوسیوں کے بڑے حقوق ہیں اور اس ادائے حق کا سب سے زیادہ موقع عورتوں کو ہاتھ آتا ہے۔ لیکن مشکل یہ ہے کہ دو پڑوسی ہوں تو کس کو ترجیح دی جائے۔ چنانچہ حضرت عائشہؓ نے ایک دفعہ یہ سوال پیش کیا۔ جواب ملا کہ ’’ جس کا دروازہ تمہارے گھر سے زیادہ قریب ہو‘‘۔ اسی طرح حضرت عائشہؓ کے بیسیوں سوالات اور مباحث احادیث میں مذکور ہیں جو در حقیقت ان کے روزآنہ تعلیم کے مختلف اسباق ہیں ۔
ان سوالات اور مباحث کے علاوہ آنحضرت (صلی اللہ علیہ وسلم) خود بھی حضرت عائشہؓ کی ایک ایک ادا اور ایک ایک حرکت کی نگرانی کرتے اور جہاں لغزش نظر آتی ، ہدایت و تعلیم فرماتے۔ ایک دفعہ آنحضرت (صلی اللہ علیہ وسلم) کی خدمت میں چند یہودی آئے اور بجائے السلام علیک کے (تم پر سلامتی ہو ) زبان دبا کر السام علیک (تم کو موت آئے) کہا آنحضرت (صلی اللہ علیہ وسلم) نے اس کے جواب میں صرف وعلیکم (اور تم پر) فرمایا حضرت عائشہؓ سُن رہی تھیں وہ ضبط نہ کر سکیں ، بولیں ، علیکم السام واللّعنۃ ( تم پر موت اور لعنت) آپؐ نے فرمایا
’’ عائشہؓ نرمی چاہئے ، خدائے عزّو جلّ ہر بات میں نرمی پسند کرتا ہے‘‘۔
ایک دفعہ کسی نے حضرت عائشہؓ کی کوئی چیز چرائی۔ زنانہ رسم کے مطابق انہوں نے اس کو بد دعا دی ، ارشاد ہوا ’’ بد دعا دے کر اپنا ثواب اور اس کا گناہ کم نہ کرو‘‘۔ ایک بار وہ سفر میں آنحضرت(صلی اللہ علیہ وسلم) کے ہمراہ ایک اونٹ پر سوار تھیں ۔ اونٹ کچھ تیزی کرنے لگا۔ عام عورتوں کی طرح ان کی زبان سے بھی لعنت کا کلمہ نکل گیا۔ آپؐ نے حکم دیا کہ اونٹ کو واپس کر دو ، ملعون چیز ہمارے ساتھ نہیں رہ سکتی۔یہ گویا تعلیم تھی کہ جانور تک کو بُرا نہیں کہنا چاہئے۔
عام طور سے لوگ اور خصوصاً عورتیں معمولی گناہوں کی پرواہ نہیں کرتیں ۔ آپؐ نے حضرت عائشہؓ کی طرف خطاب کر کے فرمایا ،عائشہ معمولی گناہوں سے بھی بچا کرو ، خدا کے ہاں ان کی بھی پرسش ہو گی۔ ایک دفعہ وہ آنحضرت (صلی اللہ علیہ وسلم) سے کسی عورت کا حال بیان کر رہی تھیں ۔دوران گفتگو میں بولیں کہ ’’ وہ پست قد ہے‘‘ آپ نے فوراً ٹوکا کہ ’’ عائشہؓ یہ بھی غیبت ہے ‘‘۔
حضرت صفیہؓ کسی قدر پست قد تھیں ۔ ایک دن انہوں نے کہا ’’ یا رسول اللہ ! بس کیجئے صفیہ تو اتنی ہیں ‘‘۔ آپ نے فرمایا ’’ تم نے ایسی بات کہی کہ اگر سمندر کے پانی میں بھی ملاؤ تو ملا سکتی ہو ‘‘ یعنی یہ غیبت ایسی تلخ بات ہے کہ سمندر کے پانی میں ملا دی جائے تو کل پانی بد مزہ ہو جائے ۔ عرض کیا ’’ یا رسول اللہ ! میں نے تو ایک شخص کی نسبت واقعہ بیان کیا‘‘ فرمایا کہ اگر مجھ کو اتنا اور اتنا بھی دیا جائے تو بھی یہ بیان نہ کر وں ‘‘ یعنی مجھ کو کسی قدر بھی لالچ دلائی جائے تو میں ایسی بات کسی کے متعلّق نہ کہوں ۔
ایک دفعہ کسی سائل نے سوال کیا۔ حضرت عائشہؓ نے اشارہ کیا تو لونڈی ذرا سی چیز لیکر دینے چلی۔ آپ نے فرمایا ’’ عائشہؓ گن گن کر نہ دیا کرو ورنہ خدا تم کو بھی گن گن کر دیگا ‘‘ دوسرے موقع پر فرمایا ’’ عائشہ ! چھوہارے کا ایک ٹکڑا بھی ہو تو وہی سائل کو دیکر جہنم کی آگ سے بچو۔‘‘
ایک موقع پر آپ نے یہ دعا مانگی ’’ خداوندا !مجھے مسکین زندہ رکھ، حالتِ مسکینی ہی میں موت دے اور مسکینوں ہی کے ساتھ قیامت میں اٹھا ‘‘۔ حضرت عائشہؓ نے عرض کی یہ کیوں یا رسول اللہ (صلی اللہ علیہ وسلم) ؟ فرمایا
’’ مسکین دولت مندوں سے چالیس سال پہلے جنت میں جائیں گے ۔ اے عائشہؓ ! کسی مسکین کو خالی ہاتھ واپس نہ کرنا گو چھوہارے کا ایک ٹکڑا ہی کیوں نہ ہو۔ مسکینوں سے محبت رکھو اور ان کو اپنے پاس جگہ دیا کرو ‘‘۔
ان مختلف اخلاقی نصیحتوں کے علاوہ نماز ، دعا اور دینیات کی اکثر باتیں آنحضرت(صلی اللہ علیہ وسلم) ان کو سکھایا کرتے تھے اور وہ نہایت شوق سے ان کو سیکھا کرتی تھیں اور ہر ایک حکم کی شدّت کے ساتھ پابندی کرتی تھیں ۔
