انٹرویو محترمہ مشکوٰۃ صاحبہ

[مشکٰوۃ]

18۔ مستقبل میں کیا کچھ کرنے کا عزم رکھتی ہیں ہمیں بھی اس سے آگاہ کیجئے ہوسکتا ہے آپ کو محدث فورم سے کوئی ہمنوا مل جائے ؟

بڑوں کے لئے کام ہو رہا ہے اور بہت ہو رہا ہے۔ماشاء اللہ ۔۔۔میں بچوں کے لئے کام کرناچاہتی ہوں چاہے وہ کسی بھی انداز میں ہو ۔یعنی مجھے لغویات کا شوق ہے اور مزید یہی کام سرانجام دینا چاہتی ہوں۔ابتسامہ
ابتدا اچھی ہو تو انتہا پر خود ہی آسانی ہو جاتی ہے لیکن ہم انتہا پر پہنچ کر ابتدا چاہتے ہیں۔شروع سے ہی بچوں کے ساتھ زیادہ وقت گزارا تھا اورہے بقول آپی کے"یہ بچوں کے معاملے میں پاگل ہے"چونک کر ہماری طرف دیکھتے ہوئے"مشکٰوۃ! اصل والا پاگل نہیں کہہ رہی دوسرے والا کہہ رہی ہوں" ابتسامہ
بچے چاہے خاندان کے ہوں یا جانے ان جانے محلے بھر کے بچے ،جب بڑے اپنی "گفتگو" میں مصروف ہوں تو میں بچو ں کے ساتھ وقت گزارنے کو ترجیح دیتی ہوں ،ان کی معصوم ، چھوٹی چھوٹی بغیر لگی لپٹی باتیں،تجربات،شرارتیں سب اچھا لگتا ہے۔لیکن وقت گزرنے کے ساتھ ساتھ محسوس ہو رہا ہے کہ بچوں میں بچپن نہیں رہایا بچے بہت" سمجھ دار" ہوگئے ہیں ،معصوم معصوم باتوں کی جگہ شکوے شکایتوں نے لی ہے ،اپنے ہی اعزاء کی برائیاں ،مہینوں پرانی باتیں،عجیب الفاظ سن کر بہت افسوس ہوتا ہے ،سمجھ نہیں آتا کہ کیا کروں کبھی سوچتی ہوں قصور بچوں کا نہیں ہے،والدین کی ذمہ داری ہے انہیں احساس ہونا چاہیئے رویوں اور عمل میں اپنے بچوں سے بہت کچھ چھینتے جا رہے ہیں۔۔والدین بہت کچھ چاہ رہے ہوتے ہیں لیکن عمل کر کے نہیں دکھاتے اور بچے عمل، مشاہدے کے حریص۔۔۔
دینی معاملات میں والدین کی شکایت ہوتی ہے نماز نہیں پڑھتےنماز پڑھنے کا کہوں تو چار پانچ سال کے بچےکہتے ہیں " باجی ! امی تو پڑھتی نہیں ہیں،ہم کیسے پڑھیں؟"
معاشرت رویوں پرجھوٹ ،غیبت سے روکوں تو جواب آتا ہے " باجی امی فلاں آنٹی سے یہ کہہ رہی تھیں ،ایسا ہو گیا ویسا ہو گیا"
کزنز کے ساتھ مل جل کر کھیلنے کا کہو تو " میری امی کہتی ہیں ان کی امی نے ہمارے ساتھ ایسے ایسے کیا ،ہم کیوں ان سے بات کریں،ان کو کوئی چیز کیوں دیں ،اپنی لے کر آئیں ۔۔۔دادو نے یہ کیا ۔۔۔چچی ایسی ہیں ۔۔۔چاچو ویسے ہیں۔۔۔۔خالہ نے ایسے کہا تھا۔۔ماموں ہمیں یوں کہتے تھے اپنے بچوں کوکچھ نہیں کہتے۔۔۔"پتہ نہیں ہمارا بچپن کہاں گزر گیا تھا۔
پڑھائی کے نام پر اس قدر بوجھ ہے کہ دو منٹ کو فرصت نہیں۔بوجھ سمجھتے ہوئے ،مستقبل بہتر کرنے کے نام پرطویل دورانیے کے سکولز،ٹیوشن کی تلاش رہتی ہے کہ سر سے بلا ٹلی رہے۔بچوں کی اپنی زندگی ہے ،والدین اپنی دنیا میں مگن ہیں۔
اوپر سے میڈیا کی بھر مار ہے ذرا بچے نے چوں چاں کی تو کارٹون لگا دو ،چپ کر جائے گا ،کچھ کھلانے پلانے کے لئے بھی موبائل ہاتھ میں تھما دیا جاتا ہے کہ توجہ ادھر بٹی ہے آرام سے کھا لے گا۔
اور بچے بھی تفریح کے لئے ایسے لایعنی سے نام لیتے ہیں جن کی سمجھ نہیں آتی۔"چھوٹا بیم" لگا دو ، آپ نے "اڈورا" کے کارٹون نہیں دیکھے۔۔بلا بلا بلا۔۔۔دین ،ثقافت،انسانیت سے دوری ۔۔۔پتہ نہیں آنے والا دور کیا ہو گا۔۔۔۔۔۔۔۔؟

واضح ہوکہ کوئی اپنے الفاظ یہ کہہ کر ضائع نہ کرے کہ جب خود پر پڑے گی تو پتہ چلے گا،پہلے پہل بہت باتیں کرنی آتی ہیں "کیونکہ یہ سب سننے کو ملتا رہتا ہے لہذا کہنی ہے تو کوئی نئی بات کہی جائے۔۔۔ابتسامہ

 

[مشکٰوۃ]

19۔ہدایت اللہ کی طرف سے آتی ہے، مگر اللہ تعالی ایسے اسباب بنا دیتے ہیں ، جو ہدایت کا باعث بن جاتے ہیں ، آپ کی زندگی میں ان اسباب کا کیا کردار رہا؟؟

جیسا کہ میں نے پہلے بتایا گھر کا ماحول دینی ہے تو پہلا سبب والدین ہیں ۔پھر بڑے بہن ،بھائی اور معاشرہ۔۔۔۔قریبی مسجد میں ایک عرصہ دراز ڈاکٹر فضل الٰہی حفظہ اللہ کا روزانہ درس ہوتا رہا یہ ایک بڑا سبب تھا ۔علماء میں شاید ڈاکٹر صاحب کو سب سے زیادہ سنا ہے۔
ہفتہ میں چار پانچ دن ترجمہ قرآن کی کلاس ہوتی تھی بعد میں حدیث کا درس بھی شروع کیا گیا تھا۔اور ساتھ میں چچا جی کی آڈیو لائبریری ایک بڑا سبب بنی اور زندگی کا نیا موڑ بھی۔
چچا جان کے شفٹ ہونے پر ان کی آڈیو لائبریری میں حقیقی معنوں میں بھونچال آیا ہوا تھاسینکڑوں کی تعداد میں کیسٹس تھیں جنہیں ترتیب دینی تھی جسے سمیٹنے کی ذمہ داری چچا جی نے مجھے سونپ دی تھی بلکہ میں نے خود ہی لے لی تھی ۔چچا جی نے ایک دفعہ کہا کہ" مشکٰوۃ یہ آؤ تمہیں لائبریری دکھاؤں اسے ترتیب دینی ہے "، لائبریر ی کی چاروں دیواروں پر مکمل ریک ۔۔فرش پر کیسٹس کا انبار قدم دھرنے کی جگہ نہ تھی میں حیران کہ اتنیییییی زیادہ کیسٹس کون سنے اور ترتیب لگائے ؟چچا جی پریشانی بھانپ کر کہنے لگے "اسے مل کر سمیٹیں گے "،لیکن ایک دن چچا نے بتا یا کہ کیسے ترتیب دینی ہے اور پھر چچا کی باہر کی مصروفیت اور میں شوق شوق میں روزانہ سکول سے آنے کےبعد بمشکل دو گھنٹےگھر میں گزارنے کے مغرب تک لائبریری میں رہتی مکمل کیسٹ سن کر عالم کا نام تقریر کا موضوع لکھتی اور واپسی پر دس بارہ کیسٹ ساتھ لے آتی جنہیں ساری رات جاگ کر سنتی رہتی امتحاں سر پر تھے ۔۔ساتھ میتھ کے سوال ہوتے اور ساتھ میں کیسٹ سنتی رہتی ۔ایک ایک لفظ سنتی تھی جو ذرا سا کسی کا شور ہو تو کیسٹ ریورس ۔۔۔اس پر ڈانٹ بھی پڑ جاتی تھی کہ تقریر حفظ ہو رہی ہے ۔ابتسامہ
شایداسی کی بدولت خود کو اچھاسامع سمجھتی ہوں۔۔
بہت سی نایاب تقاریر ،مناظرے ،مناقشے ،انٹرویوز،علامہ احسان الٰہی رحمہ اللہ ،عبداللہ ناصر رحمانی ،خالد الراشد،معراج ربانی ، توصیف الرحمٰن الراشدی حفظہم اللہ وغیرھم کی تقاریر سنیں ۔۔۔۔۔۔لیکن جب آخری ریک رہ گیا تو چچا کا بیرون ملک شفٹ ہونے کاپروگرام بن گیا۔۔ہم لاہور گئے ہوئے تھے۔چچا جی نے تمام کیسٹس مسجد کو ڈونیٹ کر دیں۔واپسی پر کہنے لگے "بیٹا مسجد میں رکھوا دی ہیں تاکہ دوسرے بھی سن سکیں تم بھی وہیں سے منگوا لیا کرنا۔"
چچا جان کے جانے کے بعد ایک دفعہ کیسٹس منگوائیں تو لائبریری انچارج نے کہا "چھپا کے دے رہا ہوں ۔مسجد کے منتظم کو پتہ چلے گا تو ناراض ہوں گے "مجھے بہت تعجب ہوا کہ یہ کیابات ہوئی ؟دینی ہے تو سب کے سامنے دیں میں کوئی چوری کر رہی ہوں یاچوری منگوا رہی ہوں ۔۔سواگلی ہی بار میں معاملہ حل ہو گیاکہ "منتظم صاحب نے منع کر دیا ہے کہ آپ کو کوئی کیسٹ نہیں دینی"۔۔۔پہلے سوچا کہ چچا کو کہوں لیکن ساتھ ہی خیال آ گیاکیسٹس میری تھوڑی تھیں ،چچا کی تھیں انہوں نے دے دیں ۔۔۔۔۔۔۔اور چیز اپنی ہو دوسروں کی چیز پر حق جتانے کا فائدہ۔۔۔۔۔!
بھیا گھر ہوتے تو حل نکال دیتے ۔۔۔اس کے بعد بھیا سے کیسٹ منگواتی تھی لیکن بھیا کا دیر بعد گھر چکر لگتا اور کیسٹ ایک دن میں ختم۔۔انہی دنوں اسلامی یونیورسٹی کا ایف ایم چینل نیا نیاشروع ہوا تھا ۔۔امی کی دوست نے بتایاتو وہ سننا شروع کیا اس میں لائبریری والا تمام مواد شامل تھا۔۔۔تلاوت فیچر ،لیکچر سو اور گزشتہ سال تک مسلسل سن رہی تھی پھر نیٹ کی وجہ سے ۔۔۔۔۔آنسوؤں والا آئیکون
بہت بڑی بڑی باتوں کی بجائے مختصر اثر پذیر باتوں سے زیادہ سیکھتی ہوں ۔یہیں پر ایک پروگرام میں ایک بات سنی تھی جو حقیقی معنوں میں "ہدایت" کاسبب بنی تھی۔
ٹاپک تو نہ جانے کیاتھا ل لیکن کمپیئرنے صرف اتنی سی بات کہہ کر دوبارہ ٹاپک پر گفتگو شروع کر دی تھی
"جب کسی عالم کے پاس جاؤ تو جہاں جوتے اتارو وہیں جوتوں کے ساتھ اپناعلم بھی چھوڑ دو۔۔۔"
کبھی کبھی لائبریری یاد آتی ہے تو دکھ ہوتاہے لیکن پھر سوچتی ہوں نہ منتظم صاحب منع کرتے نہ چینل سنتی اور نہ ا س نصیحت کی وجہ سے زندگی بدلتی۔۔۔۔۔۔

 

[مشکٰوۃ]

20۔زندگی کے اتنے ادوار گزار لینے کا بعد زندگی سے کیا سیکھا؟؟

زندگی کا ہر گزرتا دن کوئی نہ کوئی بات سکھاتا ہے ۔۔
لیکن حاصل زندگی
قل لن یصیبنا الا ما کتب اللہ لنا۔۔۔۔۔۔۔۔۔۔۔۔۔۔
اور ہم اپنی زندگی میں کسی کو کو راضی نہیں کر سکتےیہ اور بات ہے کہ ہمارے مرتے ہی سب ہم سے راضی ہو جاتے ہیں۔۔۔ اس لئے کہتی ہوں اگر دوسروں کی رضا مندی حاصل کرنی ہے تو مر جانا چاہیئے۔

 

[مشکٰوۃ]

21۔دین اسلام کی ترقی و بلندی کے لیے ، مسلمانوں میں کس چیز کی ضرورت محسوس کرتی ہیں؟؟

عمل اور اخلاق۔

 

[مشکٰوۃ]

23۔کم عمر اور نوجوان لڑکیوں کے لیے کیا نصیحت کریں گی؟

نصیحت وہ کرے جو دوسروں کی نصیحت پر عمل کرتاہے جو دوسروں کی بات نہ سنے اسے نصیحت کرنے کا حق نہیں۔

 

[مشکٰوۃ]

24۔شرعی حدود میں رہتے ہوئے خاتون خانہ نیک اعمال اور درجات کیسے حاصل کرے؟ اس حوالے سے آپ کا طرز عمل کیا ہے؟

خاتونِ خانہ ۔۔۔ایسا لگتا ہے جیسے مرغی خانہ۔۔۔غصے والا آئیکون

اگر خاتون خانہ "شرعی حدود "میں رہ رہی ہے تو یہ ہی اس کے نیک اعمال اور درجات کا سبب ہے ۔
غلطی کوتاہی ہر انسان کی سرشت میں شامل ہے خطا نہ کرتے تو فرشتے ہوتے۔۔۔فرائض بجا لانے کی کوشش ہوتی ہے ۔۔۔نوافل کا خاص اہتمام نہیں کرتی ۔۔۔
اپنے سامنے حدیث میں ذکر کردہ دو خواتین کا احوال رکھتی ہوں کہ فرائض اور حسن اخلاق کی بدولت جنت ملے گی لیکن نوافل کی کثرت اور بد اخلاقی جہنم میں جانے کا باعث ہے ۔۔
کثرت اعمال کے بعد خواتین ،بہو ،نند ،ساس،دیورانی جٹھانی اور اوس پڑوس کی خواتین کی غیبتوں ،چغلیوں میں لگ جائیں تو فائدہ؟بہتر ہے فرائض انجام دیں اور اخلاق بہتر رکھیں دوسروں کے حقوق پورے کریں۔۔
اس میں بھی کامیاب نہیں ہوتی کوشش ہوتی ہے۔۔۔۔۔۔۔۔ تجربات سے یہی سیکھا کہ دنیامیں مشکل پڑنے پر کوئی بھی "ساتھ" نہیں چھوڑتا بلکہ ساتھ رہ کر اپنے جانے انجانے "حقوق"لیتارہتا ہے تو جو دنیا میں نہیں چھوڑتےوہ روز قیامت اپنے اصل حقوق چھوڑ دیں گے۔۔۔۔؟

 

[مشکٰوۃ]

25۔جب گھر ، شوہر ، بچے ، رشتہ داریاں متاثر ہو رہی ہوں ، تو آپ کی ترجیح کیا ہوتی ہے؟

کیامطلب ؟؟؟ کس سے متاثر ہورہی ہوں؟؟؟
اگر آپس میں متاثر ہو رہی ہوں تو "گھر" کو ترجیح دوں گی ،،،باقی سب خود بخود اس میں آ جائیں گے۔۔
رشتہ داریاں "نبھاتے،نبھاتے" گھر کا کباڑ کرنا پسند نہیں!

 

[مشکٰوۃ]

26۔ایک آئیڈیل عورت ، بیوی کیا ہوتی ہے؟ اور ایک آئیڈیل شوہر ؟

آئیڈیل بیوی وہ ہوتی ہے جو اندھی گونگی بنے چوبیس گھنٹے کام میں جتی رہے اور آئیڈیل شوہر وہ ہوتاہے جو بغیر چوں چراں کئے بیوی کے سامنے ہاتھ باندھے اس کی لازوال اور لامحدود خواہشات پوری کرنے کے لئے تیار رہے۔
لوگ منہ سے اظہار نہ کریں دل میں یہی کچھ ہوتاہے ۔الا ماشاء اللہ
آئیڈلائز کرنے کے لئے نبی اکرم صلی اللہ علیہ وسلم اور سیدہ عائشہ رضی اللہ عنہا کی مثال ضرور یاد آئے گی لیکن ان کی زندگیوں میں جھانک کر دیکھنا گوارہ نہیں ۔وہاں پر بھی معاملات ہوتے تھے لیکن وہ آئیڈیلائز کرتے وقت بھول جاتاہے ۔۔۔چھوڑو جی آج کے دور کے بھی کچھ" تقاضے" ہیں۔۔۔
"ایڈل۔۔۔۔۔۔۔۔۔۔۔آئیڈل" کچھ نہیں ہوتایہ سب ہماری ذہنی اختراع ہے۔

 

[مشکٰوۃ]

27۔کامیاب شادی کا مطلب ذہنی ہم آہنگی ، سمجھوتہ یا مزاج کی مطابقت ہے ، یا کچھ اور ؟

قسمت!
بڑی بوڑھیاں قسمت اچھی ہونے کی دعا دیتی ہیں ۔۔۔ذہنی ہم آہنگی یا مزاج کی مطابقت کی نہیں۔
اور سمجھوتہ میرے نزدیک کوئی چیز نہیں!
سمجھوتہ ذمہ دارویوں سے کیا جائے ۔۔۔۔۔مجبوری کا نام سمجھوتہ نہیں۔

 

[lovelyalltime]

آئیڈیل بیوی وہ ہوتی ہے جو اندھی گونگی بنے چوبیس گھنٹے کام میں جتی رہے اور آئیڈیل شوہر وہ ہوتاہے جو بغیر چوں چراں کئے بیوی کے سامنے ہاتھ باندھے اس کی لازوال اور لامحدود خواہشات پوری کرنے کے لئے تیار رہے۔
لوگ منہ سے اظہار نہ کریں دل میں یہی کچھ ہوتاہے ۔الا ماشاء اللہ

یہ آپ نے کس بنیاد پر کہا - کیا واقعی
آئیڈیل بیوی اور آئیڈیل شوہر ایسا ہی ہوتا ہے -