![محدث فورم [Mohaddis Forum]](/styles/default/xenforo/Forum.jpg)
پہلے تو اپنے شرمیلے پن کی وجہ سے مکمل طور پر انفرادیت پسند تھا۔ میں کسی بھی تقریب جیسے شادی بیاہ یا پکنک یا ایسی جگہ جہاں چار لوگ جمع ہوں جانا پسند نہیں کرتا تھا۔ لیکن اب شخصیت میں اتنا فرق پڑا ہے کہ کبھی کبھی اجتماعات میں بھی شرکت کرلیتا ہوں۔ یعنی اب اجتماعیت پسند اور انفرادیت پسند دونوں ہوں۔ بس انفرادیت پسند زیادہ ہوں اور اجتماعیت پسند کم ہوں۔
انٹرنیٹ خصوصاً فورمز کی دنیا میں پہلے پہل ہلہ گلہ ڈاٹ کام کے ذریعے متعارف ہوا پھر دیوبندیوں کے ’’حق فورم‘‘ تک رسائی ہوئی۔ وہاں کافی طویل عرصہ گزارا جس میں بحث و مباحثہ کے ذریعہ بہت کچھ سیکھنے کا موقع ملا پھر مجھے وہاں بین کردیا گیا اسکا سبب ملنگ دیوبندی کا ایک دھاگہ بنا جس میں اس نے حافظ زبیرعلی زئی رحمہ اللہ سے متعلق ایک مشکوک خط پیش کیا جس میں ابوحنیفہ کو دو مرتبہ ’’ابوخبیثہ‘‘ لکھا گیا تھا۔ اگرچہ میں اس دھاگے میں شرکت نہیں کرنا چاہتا تھا لیکن حق فورم کی انتظامیہ نے تمام اہل حدیث ممبران کو پابند کیا کہ ہرحال میں اس دھاگہ میں شرکت کرکے یہ بتاؤ کہ حافظ زبیرعلی زئی رحمہ اللہ نے ابوحنیفہ کے بارے میں صحیح لکھا ہے یا غلط۔ اور جب تک اہل حدیث ممبران اس دھاگے میں جواب نہیں دیتے انہیں فورم پر کہیں بھی پوسٹ کرنے کی اجازت نہیں دی جائے گی۔ اس لئے مجبوراً میں نے وہاں لکھا کہ اس خط کی نسبت حافظ زبیرعلی زئی رحمہ اللہ سے مشکوک ہے لہٰذا پہلے ثابت کیا جائے کہ یہ واقعی انہیں کا تحریر کردہ خط ہے جس کے جواب میں ملنگ اس خط کا کوئی ثبوت حافظ زبیرعلی زئی رحمہ اللہ سے پیش نہیں کرسکا۔ اسکے باوجود وہ بضد رہے کہ جواب دو کہ ابوحنیفہ سے متعلق یہ بات تمہارے نزدیک درست ہے یا نہیں؟ میں نے جواب دیا درست ہے پھر ابوحنیفہ سے منسوب کچھ فتاوے پیش کر کے کہا کہ اگر ان فتووں کی بنیاد پر ابوحنیفہ کو کسی نے ’’ابوخبیثہ‘‘ لکھ دیا تو کچھ غلط نہیں کیا۔ اس بات پر مجھے حق فورم سے غیرمعینہ مدت کے لئے بین کردیا گیا۔ اسکے بعد بھی میں ایک دو نئی آئی ڈیز جیسے ’’اصلی حنفی‘‘ اور ’’ڈیفینڈر آف حق‘‘ سے فورم پر دوبارہ حاضری دی لیکن انتظامیہ کو شک ہوتے ہی میری نئی آئی ڈیز بھی بلاک کردی گئیں۔ اس کے بعد میں وہاں نہیں گیا۔
اپنی نرم اور دوسروں کی باتوں کو برداشت کرنے والی طبعیت کی وجہ سے مجھے بہت ہی کم باتیں ناگوار گزرتی ہیں۔
اللہ تعالیٰ کی فرمابرداری کرکے دل کو مسرت اور خوشی حاصل ہوتی ہے۔ ہر نیکی خوش کرتی ہے اور ہر گناہ غمگین اور پریشان کردیتا ہے۔ اگر میں کوئی ایسا دن گزار لوں یا ایسا وقت جس میں کسی چھوٹے سے گناہ کا بھی ارتکاب نہ کروں تو وہ خوشی حاصل ہوتی ہے جس کا موازنہ کسی دوسری خوشی سے نہیں کیا جاسکتا۔
پریشان کن لمحات تو پریشانی ہی میں گزر جاتے ہیں اور اسی وقت قرار اور چین حاصل ہوتا ہے جب اللہ کے فضل کرم سے اس پریشانی سے نجات حاصل ہوجائے۔ پریشانی میرے دل و دماغ پر ایسے حاوی ہوجاتی ہے کہ کوئی خوشی میری توجہ پریشانی سے ہٹنے نہیں دیتی۔ پریشانی کی صورت میں نہ تو میرا کسی سے گفتگو کرنے کا دل چاہتا ہے نہ ملاقات کا نہ مطالعہ میں دل لگتا ہے اور نہ ہی کسی سے پریشانی شیئر کرنا اچھا لگتا ہے۔ بس اللہ سے دعا ہی سے حوصلہ اور سہارا ملتا ہے۔
اللہ کی رضا اور خوشنودی حاصل کرلینا ہے میری زندگی کا اصل مقصد ہے۔ بچپن سے ہی یہ بات میرے ذہن میں پختہ ہے کہ دنیاوی فوائد عارضی ہیں لہٰذا ان کے پیچھے بھاگنا بے کار ہے بس اللہ کو راضی کر لیا جائے یہی اصل کامیابی ہے۔
بس اللہ کو راضی کرنے کی خواہش ہے اور یہی اصل خواب ہے۔
مجھے موت سے بہت ڈر لگتا ہے۔ موت کی سختی کا تصور مجھے خوف زدہ کردیتا ہے اور یہ خیال کہ نجانے اللہ نے میرے متعلق جنت اور جہنم میں سے کیا فیصلہ کر رکھا ہے۔
میں مستقبل کے بارے میں زیادہ نہیں سوچتا۔ بس یہ چاہتا ہوں کہ مستقبل میں میری دینی حالت موجودہ حالت سے بہتر اور اچھی ہو۔ ان شاء اللہ
کسی سے پہلی ملاقات ہی میرے لئے سوہان روح ہوتی ہے اس لئے کامیابی سے وہ ملاقات ہوجائے اسی پر اللہ کا شکر ادا کرتا ہوں۔ پہلی ملاقات میں مجھے اپنی ہی فکر پڑی ہوتی ہے اس لئے میں سامنے والے میں کچھ بھی ملاحظہ نہیں کرتا۔