محدث بک

[اخت ولید]

ہمارے یہاں شرفاء کی نئی قسم معرض وجود میں آئی ہے۔وہ شرفاء جو افعال میں تو شریف ہوتے ہیں لیکن اقوال میں قطعا نہیں۔بے حیائی ،بے حیائی ہے چاہے قولی ہو یا فعلی۔فاحذر!!​

 

[خضر حیات]

اس نے کہا : میں بھی انہیں ملحد و زندیق ہی مانتا ہوں ، لیکن ان کے ادب پاروں اور شعر و شاعری کا مطالعہ اس لیے کرتا ہوں تاکہ تبلیغ دین کے لیے زبان و بیان میں بہتری لا سکوں .
عرض کیا : پہلے دین سیکھ لیں ، جس کی تبلیغ کرنی ہے ۔
برصغیر میں ، شکوک و شبہات اور مسلمات دین کا انکار انہیں ’ ادیبوں ‘ کی ’ تبلیغ ‘ کا نتیجہ ہے ۔
مکالمہ ختم ہوا ۔

 

[خضر حیات]

فلسفہ کے ایک طالبعلم کا اپنے غیر فلسفی والد کے ساتھ مکالمہ .
باپ : بیٹا فلسفے کا کیا فائدہ ہے ؟
بیٹا : اباجان دستر خوان پر ایک مچھلی ہے ، میں اسے دو ثابت کرسکتا ہوں ۔
باپ : ( مچھلی لے کر ) بیٹا یہ میری ہوئی ، دوسری آپ لے لو ۔

 

[خضر حیات]

اچھے مولوی اچھے لوگوں کو مل جاتے ہیں ۔ مولوی کو ایک ملازم جتنی بھی اہمیت دی جائے تو ، کم ازکم ہمیں مولوی سے شکایت کی بجائے ، اپنی لاپرواہی ، بخیلی اور دنیاوی ہوس سے شرمندگی ہوگی ۔

 

[عمر اثری]

اگر عقل مستقل طور پر امور کی معرفت اور مصالح کے ادراک کے لیے آزاد ہوتی تو ہمیں شریعت کی ضرورت ہی نہ ہوتی.

 

[عمر اثری]

عقل سلیم کبھی بھی صحیح احادیث کی مخالفت نہیں کرتی.

 

[خضر حیات]

بعض قلمی نسخوں میں ایک بہت وجد آور چیز نظر آتی ہے ۔ پرانے وقتوں میں نہ ورق کھلا میسر تھا ، نہ پیٹ والی قلمیں تھیں ، کہ ایک ہی دفعہ اونٹ کی طرح سیاہی پی کر دفتروں کے دفتر بھر دیے ۔ اس کے باوجود محدثین حدیث لکھتے ہوئے ’ صلی اللہ علیہ وسلم ‘ کو بار بار لکھنےمیں ذرا بھی اکتاہٹ محسوس نہیں کرتے تھے ۔
حضور صلی اللہ علیہ وسلم کے ساتھ ان کی اسی والہانہ محبت کا پروردگار نے یوں صلہ دیا کہ جہاں جہاں حضور صلی اللہ علیہ وسلم کی حدیث پہنچے گی ’ محدثین ‘ اور ’ اہل حدیث ‘ کا ذکر وہاں ضرور ہوگا ۔
اللہ تعالی تمام علماء امت کو جنت میں حضور صلی اللہ علیہ وسلم کا ساتھ نصیب فرمائے ۔

 

[عمر اثری]

آمین

 

[خضر حیات]

کچھ چیزیں جان لیوا اور کچھ ایمان لیوا ہوتی ہیں ۔ بچوں (نادانوں) کو دونوں سے بچا کر رکھنا چاہیے ۔
جان لیوا : مثلا چھری چاقو
ایمان لیوا : مثلا الحادی افکار

 

[اخت ولید]

ہمارے یہاں لڑکیوں کو شعور کی عمر میں پہنچتے ہی اذان کے وقت احتراما دوپٹہ اوڑھنا تو سکھایا جاتا ہے لیکن اذان کے احترام میں وضو کے لیے اٹھنا نہیں سکھایا جاتا۔​