مختصر صحیح بخاری - زین العابدین احمد بن عبداللطیف - حصہ سوم (یونیکوڈ)

[Aamir]

باب۔ قیامت کے روز تمام لوگ اپنے باپوں کے نام کے ساتھ پکارے جائیں گے۔
(۲۰۵۰)۔ سیدنا ابن عمرؓ سے روایت ہے کہ نبیﷺ نے فرمایا :''قیامت میں عہد شکنوں کے لیے ایک جھنڈا نصب کیا جائے گا اور پکارا جائے گا کہ یہ ہیں غداری کرنے والے فلاں کے بیٹے فلاں۔ ''

 

[Aamir]

باب۔ نبیﷺ کا فرمان :'' کرم تو مومن کا دل ہی ہے۔ ''۔
(۲۰۵۱)۔ سیدنا ابو ہریرہؓ سے روایت ہے کہ رسول اللہﷺ نے فرمایا :'' لوگ کہتے ہیں کرم (انگور ہے) حالانکہ کرم مومن کا دل ہے۔ ''

 

[Aamir]

باب۔ اس بیان میں کہ رکھے ہوئے نام کو اس سے اچھے نام کے ساتھ بدل لینا جائز ہے۔
(۲۰۵۲)۔ سیدنا ابو ہریرہؓ سے روایت ہے کہ سیدہ زینبؓ کا نام پہلے ''برہ (یعنی نیک اور صالحہ) تھا۔ لوگوں نے کہا کہ وہ اپنے نفس کی پاکی ظاہر کرتی ہیں تو رسول اللہﷺ نے ان کا نام زینب رکھ دیا۔

 

[Aamir]

باب۔ جس نے اپنے دوست کو پکارا اور اس کے نام میں کوئی حرف کم کر دیا تو یہ جائز ہے۔
(۲۰۵۳)۔ سیدنا انسؓ سے روایت ہے کہ ام سلیم سفر میں تھیں اور نبیﷺ کا غلام جس کا نام انجشہ تھا ، اونٹ کو ہانک رہا تھا۔ آپﷺ نے فرمایا :'' اے انجش !شیشوں کو آہستہ آہستہ لے چل۔ ''(شیشوں سے مراد عورتیں ہیں یعنی '' اے انجش ! ان عورتوں کے اونٹ آہستہ آہستہ ہانک۔ '')

 

[Aamir]

باب: اللہ کے نزدیک سب سے بر اکون سانام ہے ؟
(۲۰۵۴)۔ سیدنا ابو ہریرہؓ سے روایت ہے کہ نبیﷺ نے فرمایا :'' قیامت کے روز اللہ تعالیٰ کے سامنے سب سے برے نام کا وہ شخص ہو گا جس کا نام ملک الا ملاک ہو گا (یعنی شہنشاہ)۔ ''

 

[Aamir]

باب: چھینکنے والا اَلْحَمْدُ ﷲ کہے۔
(۲۰۵۵)۔ سیدنا انس بن مالکؓ سے روایت ہے کہ رسول اللہﷺ کے پاس دوا اشخاص کو چھینک آئی ایک کو تو آپﷺ نے جواب میں ''یرْحَمُکُ اﷲ'' فرمایا اور دوسرے کو کچھ نہ فرمایا۔ آپﷺ سے پوچھا گیا کہ آپﷺ نے اسے تو ''یرْحَمُکُ اﷲ'' فرمایا اور اسے نہ فرمایا ،تو نبیﷺ نے جواب دیا :'' اس نے الْحَمْدُ ﷲ کہا تھا اور اس نے نہیں کہاتھا۔ ''

 

[Aamir]

باب۔ اس بیان میں کہ چھینک اچھی ہے اور جمائی بری ہے۔
(۲۰۵۶)۔ سیدنا ابو ہریرہؓ سے روایت ہے کہ نبیﷺ نے فرمایا :''اللہ چھینک کو پسند کرتا ہے اور جمائی کو ناپسند کر تا ہے۔ جب کسی کو چھینک آئے اور وہ شخص کہے اَلْحَمْدُ ﷲ تو ہر مسلمان پر جس نے سناوا جب ہو گیا کہ یَرْ حَمُکَ اﷲ کہے لیکن جمائی چونکہ شیطان کی طرف سے ہے تو اس لیے جہاں تک ہو سکے اس کو روکے کیونکہ اس کے جمائی لینے میں ''ہا'' کہنے سے شیطان ہنستا ہے۔ ''

 

[Aamir]

اجازت لینے کا بیان

باب۔ کم آدمی زیادہ آدمیوں کو سلام کریں۔
(۲۰۵۷)۔ سیدنا ابو ہریرہؓ سے روایت ہے کہ نبیﷺ سے فرمایا :'' کم عمر والا بڑی عمر والے کو اور چلنے والا شخص بیٹھے ہوئے شخص کو اور کم آدمیوں کی جماعت زیادہ کی جماعت کو سلام کرے۔ ''

 

[Aamir]

باب۔ سوار آدمی پیدل چلنے والے کو سلام کرے۔
(۲۰۵۸)۔ سیدنا ابو ہریرہؓ ہی سے روایت ہے کہ نبیﷺ نے فرمایا :'' سوار آدمی پیدل چلنے والے کو سلام کرے اور پیدل چلنے والا شخص بیٹھے ہوئے شخص کو سلام کرے اور کم آدمیوں کی جماعت زیادہ آدمیوں کی جماعت کو سلام کر ے۔ ''

 

[Aamir]

باب: جان پہچان ہو یا نہ سب کو سلام کرنا چاہیے۔
(۲۰۵۹)۔ سیدنا عبداللہ بن عمرؓ سے روایت ہے کہ ایک شخص نے رسول اللہﷺ سے پوچھا کہ اسلام کا کونسا کام بہتر ہے ؟ تو آپﷺ نے فرمایا :'' (محتاجوں کو) کھانا کھلانا اور جس کو تو جانتا پہچانتا ہو اور جس کو نہ جانتا پہچانتا ہو ، غرض سب (مسلمانوں)کو سلام کرنا۔ ''