چند بہترین اشعار

[عمر السلفی۔]

یہ تیرے قرب کا اعجاز ہے ورنہ پہلے
طاق اتنے کہاں جینے کے ہنر میں ہم تھے

 

[عمر السلفی۔]

امید سے کم چشم خریدار میں آئے

ہم لوگ ذرا دیر سے بازار میں آئے

سچ خود سے بھی یہ لوگ نہیں بولنے والے

اے اہل جنوں تم یہاں بے کار میں آئے

یہ آگ ہوس کی ہے جھلس دے گی اسے بھی

سورج سے کہو سایۂ دیوار میں آئے

بڑھتی ہی چلی جاتی ہے تنہائی ہماری

کیا سوچ کے ہم وادئ انکار میں آئے

 

[عمر السلفی۔]

سفلے ہوئے عزیز، عزیز اب ہوئے خراب
بے جوہروں میں قدر شرافت نہیں رہی

 

[عمر السلفی۔]

ہم نے ہی لوٹنے کا ارادہ نہیں کیا

اس نے بھی بھول جانے کا وعدہ نہیں کیا

دکھ اوڑھتے نہیں کبھی جشن طرب میں ہم

ملبوس دل کو تن کا لبادہ نہیں کیا

جو غم ملا ہے بوجھ اٹھایا ہے اس کا خود

سر زیر بار ساغر و بادہ نہیں کیا

کار جہاں ہمیں بھی بہت تھے سفر کی شام

اس نے بھی التفات زیادہ نہیں کیا

آمد پہ تیری عطر و چراغ و سبو نہ ہوں

اتنا بھی بود و باش کو سادہ نہیں کیا

 

[عمر السلفی۔]

گزر چکا ہے زمانہ وہ انکساری کا
کہ اب مزاج بنا لیجئے شکاری کا

ہم احترامِ محبت میں سر جھکاتے ہیں
غلط نکال نہ مفہوم خاکساری کا

وہ بادشاہ بنے بیٹھے ہیں مقدر سے
مگر مزاج ہے اب تک وہی بھکاری کا

سب اُس کے جھوٹ کو بھی سچ سمجھنے لگتے ہیں
وہ ایسا ڈھونگ رچاتا ہے شرمساری کا

جنہیں بلندی پہ جانا ہے جست بھرتے ہیں
وہ انتظار نہیں کرتے اپنی باری کا

منظر بھوپالی

 

[عمر السلفی۔]

جب اس نے چاہنے والوں سے اطاعت چاہی
ہم نے آداب کہا اور اجازت چاہی

 

[عمر السلفی۔]

اے کاروانِ شوق یہاں سر کے بل چلو
طیبہ کے راستے کا تو کانٹا بھی پھول ہے

 

[عمر السلفی۔]

یہ آرزو تھی تجھے گُل کے رُوبرُو کرتے
ہم اور بلبل ِبے تاب گفتگو کرتے

 

[عمر السلفی۔]

اداس ہونے کو اچھا نہیں بتاتا ہے
کوئی بھی زہر کو میٹھا نہیں بتاتا ہے

 

[عمر السلفی۔]