اقوال سلف

[عمر السلفی۔]

اہلِ بیت کے چشم و چراغ جناب عبداللہ بن عباس رضی اللہ عنہما فرماتے ہیں : ”میں نے بادشاہت کیلیے معاویہ رضی اللہ عنہ سے زیادہ موزوں شخص نہیں دیکھا۔“

(مصنف عبد الرزاق : ٢٠٩٨٥ ، سنده صحیح)

 

[عمر السلفی۔]

خالد بن ولید اور سعد بن ابی وقاص رضی اللہ عنہما میں کسی مسئلے کی وجہ سے اَن بَن تھی۔ ایک شخص نے سعد رضی اللہ عنہ کے سامنے خالد رضی اللہ عنہ کی غیبت کرنی چاہی تو آپ نے فرمایا : ”باز رہو! ہمارا باہمی معاملہ ہماری دینی اخوت پر حاوی نہیں ہو سکتا۔“

(المصنف لابن أبي شيبة : ٢٦٠٤٨)

 

[عمر السلفی۔]

”اور جو اللہ کو اپنا عذر پیش کرتا ہے، اللہ اس کا عذر قبول فرما لیتا ہے۔“

(مسند ابی یعلی : ٤٣٣٨، حسَّنه الألباني)

 

[عمر السلفی۔]

”مشکل وقت میں انسان کے خود کو دییے گئے دلاسے کبھی نہیں بھولتے۔“

(امل الخالدی)

 

[عمر السلفی۔]

تحریک آزادیِ نسواں کا سفید جھوٹ ...

”یہ معمہ بدستور حل طلب ہے کہ آخر کس منطق کے تحت حریتِ نسواں کے دعوے دار یہ سفید جھوٹ بولتے ہیں کہ عورت کا باہر کام کرنا گھر میں کام کرنے کی نسبت زیادہ شایانِ شان اور پر سکون ہے؟! کیسا دماغی خبط ہے کہ عورت اگر استانی یا میڈ بن کر پرائے بچوں کی تربیت کرے تو کیا ہی خوب ہے، لیکن وہی عورت گھر میں اپنے بچوں کی کی تربیت کرے تو یہ ایک تھکانے والا اور بیکار سا کام ہے!!“

( علی عزت بيگ || عوائق النهضة الإسلامية : 38 )

 

[عمر السلفی۔]

دعاؤں کا رشتہ ...

عبد الملک بن بشیر رحمه الله نے حسن بصری رحمه الله کو خط لکھا جس میں ان کیلیے دعائیہ کلمات تھے۔ حسن بصری فرمانے لگے : ”رُبَّ أخٍ لكَ لم تلِدْهُ أُمُّكَ!“ تمہارا کوئی بھائی ایسا بھی ہوتا ہے جسے جنم تمہاری ماں نے نہیں دیا ہوتا۔

(الطبقات الكبرى لابن سعد : ٣٣٥/٦ ، صحيح)

 

[عمر السلفی۔]

”ایک وقت آتا ہے کہ نہ گناہ میں لذت باقی رہتی ہے، نہ چھوڑنے کا حوصلہ ہوتا ہے!“

(روضة المحبين لابن القيم رحمه الله : ٤٧٠/١)

 

[عمر السلفی۔]

سُچے دلوں والے ...

”صحابہ و تابعین جب کسی جنازے میں شرکت کرتے تو کئی دن تک غم ان کی چال ڈھال میں نظر آتا رہتا۔“

(الزهد لابن المبارك : ٢٤٦ ، صحَّ عن إبراهيم النّخعي)

 

[عمر السلفی۔]

شُہرت کے غم ...

امام احمد رحمہ اللہ کے پاس ان کے چچا آئے اور دریافت کیا :”بھتیجے! اس غم اور پریشانی کا سبب کیا ہے؟“ امام صاحب نے فرمایا : ”چچا جان، مبارک ہو ان لوگوں کو، جنہیں اللہ گمنام کر دیتا ہے۔“

(سير أعلام النبلاء : ٢٠٧/١١)

 

[عمر السلفی۔]

”تم میں سے ایک شخص اپنے ساتھی کو اپنے رویے کے بوجھ تلے کچل کر رکھ دیتا ہے، طنز و تعریض کے نشتروں سے گھائل کر دیتا ہے، لہجے کی تلخی سے سے جلا کر راکھ کر دیتا ہے ؛ پھر کہتا ہے میں تو صرف مذاق کر رہا تھا!“

(خالد بن صفوان || أدب الدنيا والدين للماوردي : ٣١٨)