تفسیر احسن البیان (تفسیر مکی)

[محمد نعیم یونس]

يَسْأَلُ أَيَّانَ يَوْمُ الْقِيَامَةِ ﴿٦﴾
پوچھتا ہے کہ قیامت کا دن کب آئے گا۔ (١)
٦۔١ یہ سوال اس لیے نہیں کرتا کہ گناہوں سے تائب ہو جائے، بلکہ قیامت کو ناممکن الوقوع سمجھتے ہوئے پوچھتا ہے اسی لیے فسق و فجور سے باز نہیں آتا۔ تاہم اگلی آیت میں اللہ تعالیٰ قیامت کے آنے کا وقت بیان فرما رہا ہے۔

 

[محمد نعیم یونس]

فَإِذَا بَرِ‌قَ الْبَصَرُ‌ ﴿٧﴾
پس جس وقت کہ نگاہ پتھرا جائے گی۔ (١)
٧۔١ دہشت اور حیرانی سے برق، تحیر واندھش جیسے موت کے وقت عام طور پر ہوتا ہے۔

 

[محمد نعیم یونس]

وَخَسَفَ الْقَمَرُ‌ ﴿٨﴾
اور چاند بے نور ہو جائے گا۔ (١)
٨۔١ جب چاند کو گرہن لگ جاتا ہے تو اس وقت بھی وہ بے نور ہو جاتا ہے۔ لیکن یہ خسف قمر، جو علامات قیامت میں سے ہے، جب ہو گا تو اس کے بعد اس میں روشنی نہیں آئے گی۔

 

[محمد نعیم یونس]

وَجُمِعَ الشَّمْسُ وَالْقَمَرُ‌ ﴿٩﴾
اور سورج اور چاند جمع کر دیئے جائیں گے۔ (١)
٩۔١ یعنی بے نوری میں۔ مطلب ہے کہ چاند کی طرح سورج کی روشنی بھی ختم ہو جائے گی۔

 

[محمد نعیم یونس]

يَقُولُ الْإِنسَانُ يَوْمَئِذٍ أَيْنَ الْمَفَرُّ‌ ﴿١٠﴾
اس دن انسان کہے گا کہ آج بھاگنے کی جگہ کہاں ہے؟ (١)
١٠۔١ یعنی جب یہ واقعات ظہور پذیر ہوں گے تو پھر اللہ سے یا جہنم کے عذاب سے راہ فرار ڈھونڈے گا، لیکن اس وقت راہ فرار کہاں ہو گی؟

 

[محمد نعیم یونس]

كَلَّا لَا وَزَرَ‌ ﴿١١﴾
نہیں نہیں کوئی پناہ گاہ نہیں۔ (١)
١١۔١ وَزَرَ پہاڑ یا قلعے کو کہتے ہیں جہاں انسان پناہ حاصل کرلے۔ وہاں ایسی کوئی پناہ گاہ نہیں ہو گی۔

 

[محمد نعیم یونس]

إِلَىٰ رَ‌بِّكَ يَوْمَئِذٍ الْمُسْتَقَرُّ‌ ﴿١٢﴾
آج تو تیرے پروردگار کی طرف ہی قرار گاہ ہے۔ (١)
١٢۔١ جہاں وہ بندوں کے درمیان فیصلے فرمائے گا۔ یہ ممکن نہیں ہو گا کہ کوئی اللہ کی اس عدالت سے چھپ جائے۔

 

[محمد نعیم یونس]

يُنَبَّأُ الْإِنسَانُ يَوْمَئِذٍ بِمَا قَدَّمَ وَأَخَّرَ‌ ﴿١٣﴾
آج انسان کو اس کے آگے بھیجے ہوئے اور پیچھے چھوڑے ہوئے سے آگاہ کیا جائے گا۔ (١)
١٣۔١ یعنی اس کو اس کے تمام اعمال سے آگاہ کیا جائے گا، قدیم ہو یا جدید، اول ہو یا آخر، چھوٹا ہو یا بڑا۔ ﴿وَوَجَدُوا مَا عَمِلُوا حَاضِرًا﴾ (الکھف: ۴۹)

 

[محمد نعیم یونس]

بَلِ الْإِنسَانُ عَلَىٰ نَفْسِهِ بَصِيرَ‌ةٌ ﴿١٤﴾
بلکہ انسان خود اپنے اوپر حجت ہے۔ (١)
١٤۔١ یعنی اسکے اپنے ہاتھ، پاؤں، زبان اور دیگر اعضاء گواہی دیں گے، یا یہ مطلب ہے کہ انسان اپنے عیوب خود جانتا ہے۔

 

[محمد نعیم یونس]

وَلَوْ أَلْقَىٰ مَعَاذِيرَ‌هُ ﴿١٥﴾
اگرچہ کتنے ہی بہانے پیش کرے۔ (١)
١٥۔١ یعنی لڑے جھگڑے، ایک سے ایک تاویل کرے، لیکن ایسا کرنا نہ اسکے لیے مفید ہے اور نہ وہ اپنے ضمیر کو مطمئن کر سکتا ہے۔