انٹرویو محترم سرفراز فیضی صاحب ٭

[سرفراز فیضی]

28۔دین اسلام پر عمل کرتے ہوئے معاشرے کی کن مشکلات کا سامنا کرنا پڑا؟ اور ان رکاوٹوں کا سدباب کس طرح کیا؟

ملا کو جو ہے ہند میں سجدے کی اجازت
ناداں یہ سمجھتا ہے کہ اسلام ہے آزاد

 

[سرفراز فیضی]

29۔دین کے معاملے پر کس شخصیت پر رشک آتا ہے؟

ہمارے سینٹر کے سب سے سینئر عالم شیخ اکبر مدنی

 

[سرفراز فیضی]

30۔امور خانہ داری میں کیا کردار ادا کرتے ہیں؟

صبح ناشہ لانے کی ذمہ داری میری تھی ۔ اب بچی بڑی ہوگئی ہے ۔ بلڈنگ کے نیچے ہی دکان ہے ۔ وہ جاکر لے آتی ہے ۔ ہم ممبئی والے چائے بریڈ مسکہ ناشتے میں کھاتے ہیں ۔
کبھی کبھی بازر (خالص اردو میں سودا) لے آتا ہوں ۔ باقی گھر کے وہ سارے کام جو عورت کی طاقت کے باہر ہوتے ہیں وہ کرنے ہی پڑتے ہیں ۔ باقی وہ کام جو محترمہ کے بس میں ہوتے ہیں ان میں بالکل ہاتھ نہیں بٹاتا۔ میں خدمت کرانے کے معاملہ میں بہت ضدی ہوں اتنا کہ کبھی کبھی محترمہ ناراض ہوجاتی ہیں ۔

 

[سرفراز فیضی]

31۔کھانے میں کیا پسند کرتے ہیں؟؟

کھانے کا تو میں بہت شوقین ہوں ۔ امی کے ہاتھ کا پایا، بیوی کے ہاتھ کے کباب اور مچھلی ، بڑی بھابھی کے ہاتھ کی بریانی ، منجھلی بھابھی کے ہاتھ کا قورمہ ، شیخ کفایت کے گھر کی چائے۔ پھر الگ الگ ہوٹل کی الگ الگ ڈشز ہیں ۔ اندھیری کے ہوٹل کی چکن میتھی ، چکن پاکستانی ،ممبرا میں طوبیٰ کا چکن وہائٹ ، نیو ممبئی کے ایک ہوٹل گلشن ایران کا چکن افغانی کرلا میں نشیمن کی چکن چلی انڈین ، دلی دربار کی چکن تندوری ۔ پھر الگ الگ باورچیوں کے ہاتھ کے کھانے پسند ہیں ۔ کرلا کے باورچی کلن کے یہاں کا زم زم پلاؤ، باندرہ ویسٹ کے ایک باورچی کے ہاتھ کا چکن قورمہ

 

[سرفراز فیضی]

اگر خود کھانا بنانا پڑے تو؟؟؟

خود بنانا پڑے تو چاول بھی نہیں بنا سکوں گا۔ البتہ میں اگر کھانا بنانا سیکھوں تو اچھا کک بن سکتا ہوں۔ جب شادی ہوئی تو ہم اور ہماری محترمہ فراغت کے آخری سال میں تھے۔ شادی کے بعد وداعی ہوئی تو ان کو کھانا بنانا بہت زیادہ نہیں آتا تھا۔ میں یوٹیوب سے زبیدہ آپا کے کوکنگ پروگرام ڈاؤنلوڈ کرکے کرکے انہیں لے جاکر دکھاتا ہوں اور انہیں کھانا بنانا سکھاتا ہوں ۔ الحمد للہ ان میں بھی نئے نئے ڈشز بنانے کا شوق پیدا کردیا ہے ۔
البتہ چائے میں بہت اچھی بنا لیتا ہوں۔ اس میں میں ایکسپریمنٹ بھی بہت کرتا ہوں۔ الگ الگ چارقسم کی چائے پتیاں جو الگ الگ علاقوں سے خریدتا ہوں انہیں مکس اپ کرکے چائے بناتا ہوں ۔
چائے کے بارے میں میرا نقطہ نظر یہ ہے کہ کسی کے گھر کا ذوق جانچنا ہوتو اس گھر کی چائے پیجیے ۔ چائے کی لذت سے گھر والوں کے ذوق کا پتہ چلتا ہے۔

 

[سرفراز فیضی]

32۔ کیا آپ کا تعلق دین دار گھرانے سے ہے ؟

الحمد للہ زمانہ کے معیار کے حساب سے دین دار گھرانہ ہی ہے۔ بلکہ تھوڑا بہت علمی گھرانہ ہے۔ ہمارے دادا حافظ کتاب اللہ بہت نیک اور دین دار شخصیت تھے۔ ریاض میں وزارۃ العدل سے متعلق ہندستان کے مشہور عالم دین شیخ عبدالقدوس مدنی جو مشہور عالم دین شیخ عبدالاحد مدنی کے والد ہیں ہمارے دادا کے شاگرد ہیں ۔ ہمارے بڑے ابا جناب مولانا عبدالعلیم ماہر کا شمار ہندستان میں جماعت اہل حدیث کے کبار علماء میں ہوتا ہے ۔ تقریبا 50 سالوں سے تدریس سے جڑے ہیں بیچ میں دو سال تک مرکزی جمعیت اہل حدیث ہند کے نائب ناظم بھی رہ چکے ہیں۔ جماعت کے کئی بڑے علماء کا نام کے شاگردوں کی فہرست میں آتا ہے ۔ ہماری والدہ شارح بخاری مولانا داؤد راز کی شاگردہ ہیں ۔ اسی حوالہ سے میں جب شاعری کرتا تھا تو اپنا تخلص راز لکھتا تھا۔

 

[سرفراز فیضی]

33۔ ایسے افعال ، جن کو سرانجام دینے کے لیے لمبی زندگی کی دعا مانگتے ہوں؟

الگ الگ طرح کی تین تفسیریں لکھنا چاہتا ہوں ۔ میں نے طے کیا ہے کہ جب چالیس سال کا ہوجاؤں گا تو تفسیر پر کام شروع کروں گا۔ اللہ سے دعا کرتا ہوں کہ اللہ اتنی طویل عمر دے کہ یہ منصوبہ پورا ہوسکے ۔

 

[سرفراز فیضی]

34۔ آپ کو غصہ کتنا آتا ہے اور اُس صورت میں کیا کرتے ہیں؟

غصہ بہت کم آتا ہے۔ غصہ آنے سے پہلے اس کو روکنے کی بہت کوشش کرتا ہوں ۔ جب مجھے کوئی گالی دیتا ہے تو میں تیز آواز میں سبحان اللہ ،الحمد للہ ، اللہ اکبر اور لاالہ الا اللہ پڑھنے لگتا ہوں ۔ اس کو بتاتا ہوں" بھائی! گالی دے کر تم میرا کچھ نہیں بگاڑ سکتے۔ میں "گالی پروف" ہوں ۔ بلاوجہ اپنی آخرت خراب کررہے ہو۔ دیکھو! جو تم گالیاں دے رہے ہو وہ سب تمھارے کندھوں پر بیٹھے ہیں وہ ساری گالیاں نوٹ کررہے ہیں ۔"
تو کوشش یہی کرتا ہوں کہ غصہ نہ آنے پائے ۔ لیکن جب وہ آجاتا ہے تو میں کچھ نہیں کرتا ۔ پھر وہی سب کچھ ہوتا ہے جو غصہ کرواتا ہے۔ اور اس کے بعد ندامت کرتا ہوں ۔

 

[سرفراز فیضی]

35۔اللہ تعالی کی بے شمار نعمتیں ہیں۔کسی ایک نعمت پر تذکرہ کیجیئے۔

علم اللہ کی بہت بڑی نعمت ہے۔علم کے جس بھی درجہ پر فائز ہوں اس کےلیے اللہ کا شکریہ ادا کرتا ہوں ۔اس کے بعد بیوی اوربچے زندگی کا سکون ہیں ۔ آنکھوں کی ٹھنڈک ہیں ۔

 

[سرفراز فیضی]

18۔محدث فورم کے وہ کون سے رکن ہیں ، جن کی تحاریر سے آپ متاثر ہوئے اور آپ کو ان رکن سے دینی فائدہ حاصل ہوا؟

@ابوالحسن علوی بھائی ۔ فورم کھولنے کے بعد پہلا کام یہی کرتا ہوں کہ ڈھونڈ ڈھونڈ کر علوی بھائی کی ساری تحریریں پڑھ ڈالتا ہوں ۔ ان کی کمنٹس میں اپنی میگزین میں شائع کرتا ہوں ۔ اذان کے اس شمارے میں ان کے انٹر ویو سے تزکیہ کےلیے شیخ کی ضرورت پر ان کو جو خیالات ہیں وہ میں نے شائع کیے ہیں ۔
شیخ @کفایت اللہ ۔ علوم حدیث میں ماہر ہندستان کے علماء کی فہرست تیار کی جائے تو مجھے پوری امید ہے شیخ کا نام ٹاپ ٹین میں ضرور شامل ہوگا۔ یہ ہماری بدنصیبی ہے کہ ہم علم سے زیادہ نسبتوں کی قدر کرتے ہیں ۔ شیخ کے ساتھ رہنا اور مدینہ میں کلیۃ الحدیث میں پڑھنے کے برابر ہے ۔ یہ مجھ نالائق کی کوتاہی ہے کہ میں شیخ سے کم حقہ استفادہ نہیں کرپاتا ۔
@انس بھائی کی تحریروں سے ان کی شخصیت کا رعب ، سنجیدگی اور علمیت جھلکتی ہے۔
@شاکر بھائی کی تحریریں ان کی سنجیدہ طبعیت اور کثرت مطالعہ کی آئینہ دار ہوتی ہیں ۔
@باذوق @یوسف ثانی صاحبان کے افکار اور ان کا طریقہ اظہار دونوں بڑے منفرد ہوتے ہیں ۔
@طالب نور بھائی کی تحریریں معلوماتی اور تحقیقی ہوتی ہیں ۔
@خضر حیات بھائی کی تحریریں علم کی وسعت اور زبان کی ندرت کا خوبصورت سنگم ہے ۔
@ارسلان بھائی کی شادی والی تحریریں مجھے بہت پسند ہیں ۔ اللہ ان کا معاملہ آسان کرے۔