انٹرویو محترم ابو الحسن علوی صاحب ( علمی نگران )

[ابوالحسن علوی]

10۔آپ کی زندگی کا مقصد کیا ہے؟

زندگی کا مقصد تو ہر مسلمان کو اللہ نے دے دیا ہے اور وہ اس کا بندہ بننا ہے۔ آپ دین کے جس شعبہ میں بھی کام کرنا چاہتے ہوں یا کر رہے ہوں؛ علمی، دعوتی، اصلاحی، انتظامی، تخلیقی، تحقیقی وغیرہ، مقصد تو ایک ہی سامنے ہوتا ہے یا ہونا چاہیے اور وہ اللہ کی بندگی ہے۔ آپ کے ہر دینی کام میں دو پہلو ہونے چاہییں ایک تو کسی طرح اپنے اس دینی کام کو اپنے رب کی رضا کے حصول اور دوسرا اپنی شخصیت کے تزکیہ اور تعمیر کا ذریعہ بنا لوں۔

 

[ابوالحسن علوی]

11۔وہ کون سی ایسی خواہش یا خواب ہے جو اب تک پورا نہ ہو سکا؟

دنیاوی طور تو جس چیز کا خواب دیکھا یا خواہش کی، الحمد للہ سب پوری ہوں گئیں۔ اللھم ما اصبح بی من نعمۃ او باحد من خلقک فمن وحدک لا شریک لک فلک الحمد ولک الشکر۔ دینی خواہشات یا خوابوں کی تکمیل ابھی باقی ہے جن میں سے چند ایک کا ذکر آگے سوال نمبر 14 اور 18 کے ذیل میں بیان کروں گا۔

 

[ابوالحسن علوی]

12۔کس چیز سے خوف زدہ ہو جاتے ہیں؟

خوف زدہ سے مراد اگر تو ڈر لگنا ہے تو کتوں سے ڈر لگتا ہے اور یہ بچپن سے ہے۔ جب حفظ کے لیے گھر سے مدرسہ جاتے تھے تو رستے میں کچھ گلیوں میں کتے ہوتے تھے جو صبح یا رات کے اندھیرے میں بھونکتے یا پیچھے پڑ جاتے، جس سے ان کے حوالہ سے ایک خوف بچپن ہی سے پیدا ہو گیا۔ لیکن اب یہ شعوری کوشش سے کافی کم ہو گیا ہے۔

اس کے علاوہ جنات سے کبھی خوفزدہ ہو جاتا ہوں جبکہ وہ نیند یا بیداری میں اچانک حملہ کریں۔ لیکن یہ خوف چند لمحوں یا سیکنڈز کا ہوتا ہے کیونکہ مخصوص آیات، اذکار اور تعوذات کے پڑھنے سے ایک تو وہ بھاگ جاتے ہیں دوسرا اطمینان قلب نصیب ہو جاتا ہے۔ اسی خوف نے ایک تیسرا خوف اندھیرے کا خوف پیدا کر دیا لیکن یہ مستقل نہیں ہے۔

 

[ابوالحسن علوی]

13۔مستقبل میں ایسا کیا کرنا چاہتے ہیں ، جو ابھی تک نہیں کیا؟

ٖقرآن اکیڈمی میں ہمارے ایک استاذ رشید ارشد صاحب ہیں، ڈاکٹر اسرار احمد رحمہ اللہ کے بھتیجے ہیں، اپنے طلباء کو کچھ کرنے کے لیے بہت زیادہ ترغیب دیتے تھے۔ 1999ء کی بات ہے کہ وہ طلباء سے کہا کرتے تھے کہ جاگتے میں خواب دیکھا کرو اور پھر اس کی تعبیر تلاش کرو۔ اس دن سے باقاعدہ خواب دیکھنا شروع کیے۔ الحمد للہ! بہت سے دینی خواب پایہ تکمیل کو پہنچے لیکن دو بڑے خواب ایسے ہیں کہ جن کی تعبیر کے فی الحال کچھ حالات بنتے نظر نہیں آ رہے اگرچہ اللہ سے دعا گو رہتا ہوں کہ اللہ تعالی اس کام کو آسان بنا دیں۔

ایک خواب تو یہ ہے کہ ایک بہت عظیم الشان مرکز تحقیق یعنی ریسرچ سنٹر ہونا چاہیے جو مغرب کے مقابلے میں عالم اسلام کی نمائندگی کرے۔ اتنا بڑا ریسرچ سنٹر کہ جیسے سعودی عرب میں جامعۃ الامام ہے یا کم از کم جیسے لاہور میں پنجاب یونیورسٹی ہے۔ جامعۃ الامام تو فیصل آباد شہر جتنی بڑی یونیورسٹی ہے اور پنجاب یونیورسٹی بھی کوئی چھوٹی ہے۔ اس ریسرچ سنٹر میں اسی طرح شعبہ جات ہوں جیسا کہ یونیورسٹی میں ہوتے ہیں لیکن یہ شعبہ جات صرف سوشل سائنسز اور ہیومینیٹیز کے ہوں یعنی فلاسفی، سائیکالوجی، اکنامکس، پولیٹکل سائنس، شوشیالوجی، انٹرنیشنل ریلیشن، آرکیالوجی، اینتھراپالوجی، لاء، ایجوکیشن، لینگویجز، تقابل ادیان، مذاہب عالم، اسلام اور ایریا اسٹڈی سنٹرز وغیرہ لیکن ان میں کام صرف تحقیق کا ہو۔ ان شعبوں میں کتب اور ریسرچ جرنلز پبلش کیے جائیں اور یہ تحقیق، تحقیق برائے تحقیق نہ ہو بلکہ ہر ڈسپلن میں تحقیق کا مقصد واحد حق وباطل کی پہچان اور خیر وشر کی تمیز ہو۔ اور اس تحقیق کے نتائج انسان کو اللہ کے نزدیک کر دیں۔ اس ریسرچ سنٹر میں دنیا کے ایسے بہترین مسلمان محققین کو جمع کیا جائے جو کچھ کرنے کا جذبہ یا وژن رکھتے ہیں اور بہترین وسائل مہیا کیے جائیں کہ وہ یکسوئی سے یہ کام کر سکیں۔ اتنا بڑا ریسرچ سنٹر کام کیا کرے گا؟ تو کام کرنے کو بہت ہیں۔ اگر یہ اسلام کا ایک مثبت انسائیکلوپیڈیا ہی مرتب کر دے یا ہر ڈسپلن میں پیدا کیے گئے مغربی الحاد کا جواب ہی دے دے تو یہ بھی بہت بڑی خدمت ہے۔ پھر دوسری زبانوں میں اسلامی لٹریچر کی منتقلی بھی ایک بڑا کام ہے۔ عربی سے اردو میں دیکھ لیں کہ ترجمے کا کتنا کام ہو چکا ہے لیکن بہت باقی ہے۔ امام ابن تیمیہ رحمہ اللہ کا فتاوی جو تقریبا 37 جلدوں میں ہے، اس کا ترجمہ ہونا چاہیے لیکن ایسے کام بڑے ادارے کر سکتے ہیں۔

ایک دوسرا خواب صحیح عقیدہ اور سلف صالحین کے منہج پر ایک عظیم الشان دعوۃ اور تربیۃ سنٹر کا قیام ہے جو پوری دنیا میں کتاب وسنت کے مطابق دعوت کا کام کرے۔یہ خواب بھی 1999ء سے دیکھنا شروع کیا ہے جبکہ تبلیغی جماعت میں چالیس دن لگائے اور رائے ونڈ آنا جانا شروع ہوا۔ اس دعوتی تحریک میں دنیا میں معاصر دعوتی جماعتوں، اسلامی تحریکوں، اصلاحی کاوشوں سے بھی رہنمائی لیتے ہوئے ایک جامع نظام دعوت اور تربیت وضع کیا جائے جو عصر حاضر کے تقاضوں کے مطابق ہو۔ دعوت اور تربیت پر ایک نظام کا ایک ابتدائی سا خاکہ کچھ عرصہ پہلے تیار کیا ہے۔ یہ خاکے تیار کرنا بھی دراصل اپنے آپ کو ترغیب دلانے کا ذریعہ ہے ورنہ تو اس سے کیا ہونے والا ہے؟ کام تو اللہ کے کرنے ہی سے ہوتا ہے، انسان دعا اور محنت کر سکتا ہے۔

 

[ابوالحسن علوی]

14۔ کسی کے ساتھ پہلی مُلاقات میں آپ سامنے والے میں کیا ملاحظہ کرتے ہیں ؟

عاجزی! اور یہی چیز کسی کی شخصیت میں سب سے زیادہ متاثر کرتی ہے۔ یہ بھی ممکن ہے کہ اپنے میں اس کی کمی ہو لہذا اس لیے دوسروں میں تلاش کرتا ہوں۔ واللہ اعلم!

اپنے بارے پہلے بھی غور کرتا تھا لیکن فرائیڈ کی سائکو اینالسس کی تھیوری ہضم کرنے کے بعد اور بعد ازاں احمد جاوید صاحب کی اصلاحی مجالس میں شرکت سے اپنی شخصیت کے تجزیہ اور اپنے رویوں کے بارے غور وفکر کافی بڑھ گیا ہے۔ اور اس میں بہت کچھ عجیب تفصیلات اور مشاہدات ہیں، کسی وقت موقع ملا تو فورم پر الگ تھریڈ لگا کر بحث شروع کروں گا۔

 

[ابوالحسن علوی]

15. اِس پُرفتن دور میں دُنیا کے مجموعی حالات کو دیکھ کر آپ کیا سوچتے ہیں؟

کتاب وسنت کے منہج پر دعوتی اور اصلاحی کام کی بہت ضرورت ہے۔ اور اس میں بنیادیں دو ہی ہیں جو ہمیں کتاب وسنت اور سیرت سے ملتی ہیں۔ رات کا قیام اور دن کی تبلیغ۔ شروع میں نازل ہوئی والی ابتدائی سورتوں میں سے سورۃ المزمل اور سورۃ المدثر ہیں۔ کچھ مفسرین کی رائے میں سورۃ العلق کے بعد دوسری وحی سورۃ المزمل کی نازل ہوئی ہے۔

اور سورۃ المزمل میں ایک تہائی، نصف یا دو تہائی رات قرآن کے ساتھ قیام کا حکم ہے جو اصلاح نفس کی اصل بنیاد ہے۔ اس کے بغیر اصلاح نفس کا تصور نامکمل اور ناقص ہے، چاہے کتنی ہی ضربیں لگا لے یا مراقبے کر لے۔ اور اس سورۃ کے فورا بعد سورۃ المدثر میں انذار اور تبلیغ کا حکم ہے۔ اور دونوں احکامات کے لیے قیام کا حکم ہے۔ سورۃ المزمل میں کہا: قم اللیل اور سورۃ المدثر میں کہا: قم فانذر۔ تو ایک رات کا قیام جو اپنی اصلاح کے لیے اور دوسرا دن کا قیام جو معاشرے کی اصلاح کے لیے۔ یہ نبوی منہج کے مطابق کام کرنے کا کل دو لفظوں میں خلاصہ ہے یعنی قیام اللیل اور انذار۔ اسی منہج کے مطابق صحابہ کی جماعت بنی اور اس امت کے اول کی مطلوب ومقصود اصلاح ہوئی اور اسی منہج کے مطابق اس امت کے آخر کی بھی مطلوب ومقصود اصلاح اور تربیت ہو سکتی ہے۔

 

[ابوالحسن علوی]

16۔محدث لائبریری اور فورم ، یہ سفر کیسے مکمل کیا ؟؟ آغاز میں کیسی مشکلات سامنے آئیں؟

اس بارے زیادہ تفصیل سے تو صاحبین یعنی شاکر صاحب اور انس نضر صاحب بتلا سکتے ہیں۔ ایک تو میں نے اس وقت لائبریری اور فورم کو جوائن کیا جبکہ کچھ کام چل پڑا تھا اور دوسرا میری ذمہ داری کی نوعیت چونکہ علمی تھی لہذا میں اگرچہ مشاورت میں تو شریک رہتا تھا لیکن انتظامی معاملات، مسائل اور مشکلات کو شاکر صاحب اور انس صاحب ہی دیکھتے تھے یا ان کے ساتھ محدث ٹیم کے افراد جو معاون کے طور کام کر رہے تھے۔

 

[ابوالحسن علوی]

17۔محدث فورم کے وہ کون سے رکن ہیں ، جن کی تحاریر سے آپ متاثر ہوئے اور آپ کو ان رکن سے دینی فائدہ حاصل ہوا ؟

تقریبا تمام اراکین کی تحریروں سے فائدہ ہوتا ہے۔ ہاں، یہ بات درست ہے کہ کچھ کی تحریروں سے آپ کو علمی فائدہ ہوتا ہے اور کچھ سے اصلاحی یا کچھ تحریریں معلومات میں اضافے کا باعث بنتی ہے۔ میری رائے میں کوئی بھی تحریر کسی نہ کسی نوعیت کے فائدے سے خالی نہیں ہوتی۔ جب آپ کسی کا شکریہ ادا کرتے ہیں، یا اس کی پوسٹ کو پسند کرتے ہیں یا اسے معلوماتی ریٹ کرتے ہیں تو آپ اس سے کسی نہ کسی درجہ میں استفادہ کر رہے ہوتے ہیں۔ اگر کسی سے آپ کو اتفاق نہیں بھی ہوتا تو یہ عدم اتفاق اس کا باعث بن جاتا ہے کہ آپ اپنی اس رائے کا اظہار کریں جسے آپ درست سمجھتے ہیں تو یہ بھی فائدے ہی کی ایک قسم ہے۔ کفایت اللہ صاحب، سرفراز فیضی صاحب، انس نضر صاحب، رفیق طاہر صاحب، شاکر صاحب، باذوق صاحب، طالب نور صاحب اور ابن بشیر صاحب وغیرہ کی تحریروں سے استفادہ کیا ہے۔

 

[ابوالحسن علوی]

18۔مسقبل میں کیا کچھ کرنے کا عزم رکھتے ہیں ہمیں بھی اس سے آگاہ کیجئے ہوسکتا ہے آپ کو محدث فورم سے کوئی ہمنوا مل جائے ؟

فوری طور تو عالم عرب یا یورپ سے ایک postdoc کا ارادہ ہے، اگر اس کا موقع مل گیا۔ فتاوی ابن تیمیہ، الاحکام لابن حزم، الموافقات للشاطبی، ارشاد الفحول للشوکانی کے اردو ترجمے کا بہت دل کرتا ہے لیکن پھر سوچتا ہوں، معلوم نہیں کوئی شائع کرنے کو تیار ہو یا نہ۔

کچھ تحقیق اور تبلیغ کے کام کا ارادہ ہے، جتنی اللہ نے توفیق دی۔ اس بارے کچھ تفصیل پوسٹ نمبر 14 میں گزر چکی ہے۔

 

[ابوالحسن علوی]

19۔ہدایت اللہ کی طرف سے آتی ہے، مگر اللہ تعالی ایسے اسباب بنا دیتے ہیں ، جو ہدایت کا باعث بن جاتے ہیں ، آپ کی زندگی میں ان اسباب کا کیا کردار رہا ؟؟

بہت زیادہ رہا ہے۔ میں نے یہ واقعہ اشارتا بیان کیا ہے کہ میرے ایک بھائی محمد صہیب، جسے والد صاحب حفظ کروانا چاہتے تھے، میرے حفظ کا سبب بنے اور دوسرے بھائی محمد سہیل، علم دین کے حصول کا سبب بنے۔ اسی طرح ڈاکٹر اسرار احمد رحمہ اللہ قرآن کے ساتھ ایک شعوری اور قلبی وابستگی کا ذریعہ بنے۔ ان کے بیٹے حافظ عاطف وحید صاحب تحقیق کے میدان میں داخل ہونے کا باعث بنے۔ انس صاحب کے چھوٹے بھائی، ڈاکٹر حافظ حمزہ مدنی صاحب دینی علوم کی درس وتدریس کا سبب بنے وغیر ذلک کثیر۔